А.Лябедзька: Пытанне пра байкот выбараў трэба было ўздымаць год таму

- Менавіта год таму была дыскусія па гэтаму пытанню, былі розныя падыходы. Але калі паклалі ўсе аргументы на шалі вагаў, то высветлілася, што ўсё ж такі больш аргументаў за тое, каб удзельнічаць у той кампаніі, каб выкарыстаць яе мажлівасці для камунікацыяў з людзьмі. Але пры гэтым не варта забывацца на тое, што Аб’яднаныя дэмакратычныя сілы пакінулі за сабой права зняць сваіх кандыдатаў за некалькі дзён да галасавання, - заявіў у інтэрвью інфармацыйнай групе АДС лідэр Аб’яднанай грамадзянскай партыі Анатоль Лябедзька.

Паводле палітыка, тыя, хто заклікаюць да байкоту выбараў у Палату прадстаўнікоў, не могуць зразумець адну простую рэч – “ва ўмовах інфармацыйнай блакады заклік не ісці галасаваць не будзе пачуты большасцю выбаршчыкаў”. Акрамя таго, як адзначыў А.Лябедзька, сітуацыя 2008 году прынцыпова адрозніваецца ад 2000, калі апазіцыя байкатавала парламенцкія выбары.

- Тая кампанія была досыць паспяховай і шмат у якіх акругах выбары не адбыліся. Таму ўлады былі вымушаныя займацца прыпіскамі. Зараз жа галасы ніхто не лічыць. І калі апазіцыя адмовіцца ад удзелу ў выбарах, улады ёй будуць толькі ўдзячны, бо не трэба будзе нічога фальсіфікаваць, - дадаў лідэр АГП.

Інфармацыйны цэнтр АДС

Версия для печати