Падтрымка палітзняволеных: стратэгія і тактыка

Гучныя судовыя справы Андрэя Кіма, Сяргея Парсюкевіча, справа супраць 14-ці ўдзельнікаў акцыі пратэсту прадпрымальнікаў вымагаюць не толькі больш глыбокага асэнсавання, але і арганізаванай, мэтанакіраванай падтрымкі.

Каб скаардынаваць дзеянні праваабаронцаў, грамадскіх актывістаў і прыцягнуць увагу да існуючых праблем, Грамадская камісія ў абарону палітрэпрасаваных распрацавала шэраг мерапрыемстваў і вызначыла асобныя групы ў падтрымку кожнага з палізняволеных.

Як паведаміў сябра камісіі Павел Севярынец, актывісты “спадзяюцца падняць хвалю салідарнасці і дыпламатычнай падтрымкі”, а пасля 9 траўня мае пачацца марафон у падтрымку рэпрасаваных.

Грамадская актывістка Эніра Браніцкая, якая ўзначальвае групу па падтрымцы С.Парсюкевіча, распавяла пра тое, якім чынам яму дапамагаюць:“Для таго, каб пазбавіць сям’ю Сяргея ад дадатковых праблем і, наколькі гэта магчыма, аблегчыць яму жыццё, вызначаем што і хто набудзе і аднясе яму ў якасці перадачы. Распаўсюджваем інфармацыю пра Сяргея, пра суд, які над ім адбыўся. Пастаянна кантактуем з адвакатам адносна скаргі, абмяркоўваем, як потым будзе рухацца справа”.

Сярод тых, хто ўваходзіць у групу па падтрымцы Парсюкевіча, -- адны з лідэраў прадпрымальніцкага руху Анатоль Шумчанка і Аляксандр Талстыка, актывіст руху “За Свабоду” Алесь Лагвінец, грамадскі актывіст Хрыстафор Жыляпаў, маці Андрэя Кіма --Таццяна Кім.

Інфармацыйны цэнтр АДС

Версия для печати