ЧАКАЕМ ЖОРСТКАЙ І АДЭКВАТНАЙ РЭАКЦЫІ МІЖНАРОДНАЙ СУПОЛЬНАСЬЦІ

Падзеі 25 сакавіка ў Менску і ў Беларусі зноў прымусілі здрыгануцца цывілізаваны сьвет.

Прысьвечаныя 90-годзьдзю абвешчаньня незалежнасьці Беларусі ўрачыстасьці на афіцыйным роўні адбыліся ў Эўрапейскім Парлямэнце, у многіх нацыянальных парлямэнтах, мэрыях гарадоў Эўропы й ЗША. Але спроба беларускага дэмакратычнага грамадзтва, моладзі, творчай інтэлігенцыі ўшанаваць юбілей у сталіцы нашай краіны закончылася крывавай расправай, якую заплянавала і ажыцьцявіла рукамі спэцназу й міліцыі цяперашняя ўлада.

Мірныя людзі сабраліся адзначыць сьвята ўскладаньнем кветак да помнікаў вялікім сынам беларускай зямлі Якубу Коласу, Янку Купалу, Адаму Міцкевічу, Максіму Багдановічу. Але людзей з кветкамі не пусьцілі да помнікаў. Іх сталі зьбіваць дубінкамі і арыштоўваць.

Больш як 130 чалавек схопленыя па краіне, зь іх больш за 100 ў Менску. Многія, у тым ліку жанчыны, зьбітыя да крыві. Затрымлівалі і білі журналістаў, ламалі ім тэхніку. Назаўтра

разглядалася 75 адміністрацыйных спраў, 26 зь іх завяршыліся арыштамі ад 5 да 15 сутак. Адрасна затрымлівалі і зьнявольвалі актыўную дэмакратычную моладзь, у прыватнасьці – лідэраў Маладога Фронту. Паводле няпоўных зьвестак, 20 чалавек атрымалі траўмы рознай цяжкасьці.

Некалькі чалавек з траўмамі галавы шпіталізаваныя.

Затрымалі таксама 13 непаўналетніх, журналістаў Літоўскага тэлебачаньня, грамадзянаў Польшчы і Украіны.

Сустаршыня Грамадзкага арганізацыйнага камітэту сьвяткаваньня 90-годзьдзя Беларускае Народнае Рэспублікі Аляксей Марачкін – знакаміты беларускі мастак. Два тыдні таму мастацкую выставу Марачкіна ў Эўрапейскім Парлямэнце адкрываў яго прэзыдэнт Ганс-Герт Пётэрынг.

24 сакавіка супрацоўнікі міліцыі ўварваліся ў майстэрню мастака, канфіскавалі карціны й сьвяточнае аздабленьне для акцыі 25 Сакавіка, а 68-гадовага чалавека кінулі за краты на 5 сутак.

Падзеі 25 сакавіка 2008 году ў Менску сьведчаць пра сапраўднае стаўленьне цяперашняй улады да незалежнасьці краіны. Улада не зьбіраецца рабіць крокаў да дыялёгу з грамадзтвам, з грамадзянскай супольнасьцю, з Эўрапейскім Зьвязам і наагул з супольнасьцю дэмакратычных краінаў сьвету. Гэта згубны шлях, які ўяўляе сабой рэальную пагрозу незалежнасьці Беларусі.

Мы чакаем, што міжнародная супольнасьць дэмакратычных краінаў, Эўрапейскі Зьвяз і ЗША ацэняць падзеі ў Менску 25 сакавіка сёлета жорстка, адэкватна і салідарна, на аснове прынятых у дэмакратычным сьвеце бясспрэчных каштоўнасьцяў. Афіцыйная ўлада павінна ведаць, што аднаўленьне дачыненьняў зь ёю будзе магчымым толькі пасьля спыненьня ўсіх рэпрэсіяў, вызваленьня ўсіх зьняволеных і затрыманых, забесьпячэньня дэмакратычных правоў і свабодаў для ўсіх грамадзянаў.

Павінна быць пэрсанальная адказнасьць за рэпрэсіі ды нематываваную жорсткасьць. Мы падтрымліваем адрасныя, пэрсанальныя санкцыі візавага і фінансавага характару з боку міжнароднай супольнасьці супраць арганізатараў і выканаўцаў рэпрэсіяў

У цяперашняй сытуацыі галоўная справа адказных дэмакратычных сілаў краіны – несьці грамадзтву аб’ектыўную інфармацыю, мабілізаваць яго на абарону сваіх фундамэнтальных правоў і свабодаў, незалежнасьці краіны. Заклікаем усіх, якім дарагія незалежнасьць і свабода, далучацца да дэмакратычных палітычных партыяў і арганізацыяў

27 сакавіка 2008 г.

Менск

Версия для печати