Масавая атака на незалежных журналістаў - ператрусы на кватэрах і ў офісе Партыі БНФ

Сёньня раніцай у шэрагу рэдакцый і на прыватных кватэрах журналістаў пачаліся ператрусы. Таксама вядзецца ператрус офісу Партыі БНФ у Горадні, што на вуліцы Будзёнага.

12.00 Супрацоўнікі Бярозаўскага рэгіянальнага аддзяленьня КДБ Валеры Дайнэка і Вадзім Даніловіч праводзяць ператрус у кватэры незалежнай журналісткі, сябры Партыі БНФ Тамары Шчапёткінай. Службоўцы прад’явілі спадарыні Шчапёткінай пастанову менскай пракуратуры аб узбуджэньні крымінальнай справы ў дачыненьні да Андрэя Абозава, Алега Мініча і Паўла Марозава, якія абвінавачваюцца ў стварэньні сатырычных фільмаў пра Аляксандра Лукашэнку. У Тамары Шчапёткінай канфіскавалі сыстэмны блёк ад кампутара і некалькі асобнікаў незалежных газэтаў.

11.00 Таксама ператрусы праходзяць на кватэрах незалежных журналістаў у Берасьці, Горадні, Віцебску, Бярозе, Гомелі.

10.50 З 7.40 раніцы сёньня ідзе ператрус у кватэры сябра БАЖ Эдуарда Мельнікава (самога журналіста ў Беларусі няма).

Ператрусы праходзяць на кватэрах журналістаў, што супрацоўнічаюць зь "Белсатам".

У прэсавай службе Менскага ГУУС сытуацыю пакуль не камэнтуюць.

9.40 Двое экспэртаў "Эўрапейскага радыё для Беларусі", якія знаходзіліся ў офісе адной зь менскіх фірмаў, не даступныя. Іх тэлефоны не адказваюць.

Паводле адной з супрацоўніцаў радыё, у памяшканьні, дзе яны знаходзяцца апушчаныя жалюзі. Экспэрты з 9.03 раніцы не адказваюць на тэлефанаваньні.

Каля будынку стаяць два мікрааўтобусы зь цёмным шклом. 

9.10 На кватэры супрацоўніка "Радыё Рацыя" у Менску адбываецца ператрус.

Паводле папярэдняй інфармацыі яго праводзяць супрацоўнікі КДБ. Паводле аднаго з супрацоўнікаў радыё, якому ўдалося зьбегчы, а 8.30 супрацоўнікі спэцслужбаў зрабілі засаду каля кватэры і затрымлівалі ўсіх, хто ішоў у яе кірунку ў пад'езьдзе. Затрыманы журналіст Барыс Гарэцкі. Ягоны тэлефон адключаны.

Версия для печати