105 прадстаўнікоў адзінага спісу АДС працягваюць барацьбу за дэпутацкія мандаты

31 ліпеня Прэзідыум Палітрады АДС падлічыў колькасць кандыдатаў ад адзінага спісу апазіцыі, якія працягваюць удзел у выбарчай кампаніі. Згодна з канчатковымі дадзенымі, барацьбу за дэпутацкія мандаты працягваюць 105 дэмакратычных актывістаў.
 
Пасля рэгістрацыі ініцыятыўных груп кандыдатаў у дэпутаты адзіны спіс АДС паменшыў на пяць чалавек. У ім засталося 105 прэтэндэнтаў. Такая лічба была агучаная падчас паседжання Прэзідыума Палітрады АДС у Мінску. Групы трох кандыдатаў – Змітра Вінагарадава, Уладзіміра Паклонскага і Петра Кузняцова – былі па розных падставах не зарэгістраваныя акруговымі камісіямі. Яшчэ два актывісты Аб’яднаных дэмакратычных сіл не вытрывалі ціску з боку ўладаў і  дабраахвотна адмовіліся ад удзелу ў выбарчым марафоне. Тым не менш, партыйныя лідэры вынікамі рэгістрацыі груп задаволеныя. Кажа сустаршыня Палітрады АДС Анатоль Лябедзька:

- На сённяшні дзень, калі падсумаваць вынікі, то яны, у асноўным, усё ж такі пазітыўныя. Мы закрылі больш за 100 акругаў. Там працуюць ініцыятыўныя групы. У іх склад уваходзіць не менш за 15 актывістаў, а ў некаторых колькасць сябраў перавышае нават 80 чалавек. Гэта азначае, што кожны вечар тысячы людзей працуюць, і маюць матывацыю працаваць.  
   
А гэта, паводле А.Лябедзькі азначае, што стратэгія, распрацаваная АДС, больш эфектыўная, чым прапановы некаторых палітычных суб’ектаў байкатаваць парламенцкія выбары:

- Падтрымліваць праект байкоту – гэта азначае, што ў гэты вечар людзі б займаліся чым заўгодна: пілі піва, глядзелі тэлевізар, ездзілі на летнікі, але б не працавалі з людзьмі.

Анатоль Лябедзька таксама падкрэсліў, што ў аб’яднаных дэмакратычных сіл яшчэ ёсць магчымасць закрыць апошнія 5 аругаў. Па першае, у некторыя з іх кандыдаты будуць вылучаныя праз партыйныя з’езды. А па-другое, кіраўніцтва АДС плануе правесці кансультацыі з дэмакратычнымі кандыдатамі, якія балатуюцца па праблемных акругах і прапанаваць некаторым з іх далучыцца да адзінага спісу апазіцыі.

Радыё Рацыя

Версия для печати