Л.Ярмошына: Датэрміновае галасаванне - вельмі прагрэсіўная мера

Старшыня Цэнтрвыбаркама Беларусі Лідзія Ярмошына лічыць датэрміновае галасаванне "вельмі прагрэсіўнай мерай". Аб гэтым яна заявіла 24 ліпеня падчас анлайн-канферэнцыі, якая была арганізавана на сайце БЕЛТА.

"Я лічу датэрміновае галасаванне вельмі прагрэсіўнай мерай, вельмі зручнай для выбаршчыкаў. У сілу таго, што гэта — магчымасць удзельнічаць у выбарах усім, нават тым, у каго нядзеля занята пад іншыя важныя справы. Таму я за тое, каб гэты інстытут захоўваўся, тым больш што ён мае месца быць у тым ліку ў такіх "эталонах дэмакратыі", як, напрыклад, Злучаныя Штаты Амерыкі, дзе практыкуецца датэрміновае галасаванне ад 3 да 45 сутак. Таму я лічу, што гэта зручна і павінна прымяняцца", — заявіла Л.Ярмошына.

Адказваючы на пытанне, ці не стварае гэты інстытут глебу для лішніх негатыўных выказванняў наконт фальсіфікацыі выбараў, кіраўнік ЦВК зазначыла: "Глебу ў нас можа стварыць любы інстытут. Любое, нават вельмі добрае пачынанне можна ператварыць у падставу для крытыкі чаго-небудзь".

"Падставы для крытыкі ёсць у любой дзяржаве, у тым ліку і ў тых, адкуль прыехалі замежныя назіральнікі. Таму што ўсюды ёсць праблемы. Да слова, Капенгагенскае пагадненне, якое прадугледжвае назіранне за выбарамі, падпісана ў 1990-м годзе, але Вялікабрытанія дапусціла ў краіну назіральнікаў два гады таму, змяніўшы сваё заканадаўства. Дакладна так жа, здаецца, толькі на апошнія выбары прэзідэнта ЗША былі дапушчаны назіральнікі ў мізэрнай колькасці — 20 чалавек. Дагэтуль не пускала, па-мойму, на апошнія выбары толькі дапусціла назіральнікаў Польшча. Гэта значыць у заканадаўстве большасці дзяржаў наогул запрашэнне міжнародных назіральнікаў на выбары адсутнічае, прычым дзяржаў, якія сябе лічаць проста сімвалам дэмакратызму", — заявіла Л.Ярмошына.

"Што да Рэспублікі Беларусь — так, у нас ёсць недахопы, таму што выбары праводзяць жывыя людзі, ёсць такое паняцце, як чалавечы фактар. Што ж да крытыкі, якая гучыць у наш адрас, то яна тычыцца, перш за ўсё, вынікаў выбараў і, наогул, носіць замоўны характар. Прашу звярнуць увагу: гучыць яна з заходняга замежжа. І, наадварот, тыя, хто прыязджае з краін СНД, у захапленні ад усіх працэдур, якія прайшлі ў нашай краіне. Гэта гаворыць аб тым, што ісціна ляжыць дзесьці пасярэдзіне. Давайце не будзем забываць, што назіральная місія — гэта не незалежныя эксперты, гэта палітычная місія з замоўнымі мэтамі. Гэта трэба заўсёды памятаць і ставіцца да гэтага, скажам так, спакойна. Я ж езджу ў іншыя дзяржавы, бачу, як арганізуецца выбарчы працэс у іх, і магу сказаць — мы нічым не горшыя за іншых", — сказала кіраўнік Цэнтрвыбаркама.

БелаПАН

Версия для печати