Л.Гразнова: З нашай уладай адбываецца нешта вельмі сур'ёзнае

Затрыманні грамадскіх актывістаў і апазіцыянераў у сувязі з тэрактам у Мінску 4 ліпеня працягваюцца. Аб колькасці затрыманых і ацэнцы гэтых рэпрэсіўных мераў беларускіх уладаў гаварылася на прэс-канферэнцыі праваабаронцаў ва ўправе БНФ. Там праваабаронца Людміла Гразнова выступіла са зваротам да грамадскасці і ўладных структур.

- З нашай уладай адбываецца нешта вельмі сур'ёзнае. Адпушчаны абмежаванні, якія існавалі цягам многіх гадоў. Псіхічны кампанент аказваецца дамінуючым у справе дзяржаўных працэсаў. Гэта вельмі небяспечна.

Я звяртаюся не толькі да звычайных людзей, якія зараз становяцца выпадковымі ахвярамі, але найперш да наменклатуры: да людзей, якія працуюць у міністэрствах, у судовых органах, міліцыі, КДБ, у Савеце бяспекі і Адміністрацыі прэзідэнта.

Вы разумееце, што зараз адказнасць за ўсё, што адбываецца, кладзецца таксама і на вас. У выпадку крызіса ў краіне вы таксама будзеце адказваць. І зараз наступіў той час, калі кожны чыноўнік на саім месцы павінен рабіць тое. Што неабходна ў адпаведнасці з законамі.

Мы павінны прытрымлівацца Канстытуцыі і закона. І толькі ў такім выпадку зможам захаваць краіну, сваіх дзяцей і сваю будучыню.

Інфармацыйны цэнтр АДС

Версия для печати