Масавыя арышты маладых актывістаў праходзяць па ўсёй краіне

За мінулыя суткі больш за дзесяць актывістаў дэмакратычнага руху затрыманыя па падазрэнні ў дачыненні да выбуху ў Мінску.  

Сярод затрыманых супрацоўнікамі  КДБ актывісты  грамадзянскай кампаніі «Еўрапейская Беларусь» Аляксандр Сяргіенка і Павал Кур'яновіч. Пасля ператрусу іх адвезлі на допыт.

Сястра Паўла Кур’яновіча Паліна паведаміла Радыё Свабода, што яе брат патэлефанаваў ёй з тэлефона следчага і сказаў, што яго трое сутак будуць трымаць у ізалятары часовага ўтрымання як падазраванага ў крымінальнай справе (злоснае хуліганства), якую распачалі паьля выбуху самаробнай бомбы падчас святочнага канцэрту 4 ліпеня.

Актывіст грамадзянскай кампаніі “Еўрапейская Беларусь” Павал Юхневіч паведаміў “Свабодзе”, што сувязь з Аляксандрам Сергіенкам адсутнічае. Паплечнікі Аляксандра лічаць, што яго таксама трымаюць у камеры ізалятара.

Паплечнікі актывіста моладзевай незарэгістраванай арганізацыі “БУНТ” Антона Койпіша таксама ўпэўненыя, што яго пасля допыту накіравалі ў ізалятар часовага ўтрымання.

На кватэры моладзевага актывіста партыі БНФ Іллі Богдана адбыўся ператрус. Супрацоўнікі КДБ шукалі рэчавыя доказы "датычнасці" Іллі да выбуху на канцэрце 4 ліпеня. Зараз ён знаходзіцца ў следчым ізалятары КДБ.

Такім чынам, за кратамі па падазрэнні ў дачыненні да выбуху падчас святочнага канцэрту трымаюць каля 10 апазыцыянэраў.

Паводле "Радыё Свабода"

Версия для печати